Croeso

Croeso i Gampws Byd-Eang Prifysgol Cymru

- oddi wrth yr Is-Ganghellor, yr Athro Marc Clement.

"Efallai eich bod yn meddwl taw dim byd yn fwy na fersiwn mwy llachar a mwy cyfoes o'n hen wefan ni yw hon, ond mae'r prosiect wedi ei gynllunio i fod yn fenter ehangach o lawer. Y wefan yw'r cynnyrch amlycaf, ond y nod yw darparu ystod gynhwysfawr o wasanaethau ar-lein - campws rhithiol lle gall holl aelodau'r brifysgol gyfarfod â'i gilydd, lle bynnag maen nhw yn y byd.

Y prif amcan yw galluogi cydweithio effeithiol – yn fewnol ac allanol – rhwng staff, adrannau, sefydliadau a myfyrwyr y Brifysgol, presennol a gorffennol. Bydd myfyrwyr, cyn-fyfyrwyr, ymchwilwyr a staff y sefydliadau yn gallu defnyddio nodweddion rhwydweithio cymdeithasol, ysgrifennu blogiau, creu grwpiau trafod, rhannu ffeiliau ac uwchlwytho fideos. Ein gobaith yw creu cymuned gref, fyd-eang, gwbl ryngweithiol o staff, myfyrwyr a chyn-fyfyrwyr – Prifysgol yng ngwir ystyr y gair.

Wrth galon y Campws mae'r system rheoli cynnwys. Amgylchedd awduro gwe hawdd ei ddefnyddio yw hwn, sy'n caniatáu i bawb gyfrannu'n hawdd. Y teclyn awduro hwn yw’r allwedd i lwyddiant y Campws Byd-Eang i'w ddefnyddwyr amrywiol. Tra bod staff Cyfathrebu yn cyhoeddi newyddion a datganiadau i’r wasg, gall Swyddog Dilysu ddiweddaru manylion y sefydliadau partner a’r cyrsiau rydyn ni’n eu dilysu iddyn nhw. A gall staff academaidd, myfyrwyr a chyn-fyfyrwyr ganfod ffyrdd newydd o gyfathrebu, o wella’u hastudio – a hyd yn oed ymlacio!

Bydd llu o nodweddion defnyddiol eraill hefyd, gan gynnwys pecynnau ar gyfer cydweithio academaidd, cyfathrebu â phobl ledled y Brifysgol, amserlennu gwaith a chyfarfodydd, e-fasnach a darparu cyfleuster i 'sgwrsio' â desg gymorth.

Gobeithio y byddwch chi'n defnyddio'r adnoddau y mae'r Campws Byd-Eang yn eu cynnig i chi, fel y byddech chi'n defnyddio cyfleusterau campws prifysgol ffisegol i gryfhau eich perthynas â'r Brifysgol. Fel rydych chi wedi clywed, mae dewis eang o bosibiliadau i'w profi, a grwpiau i ymuno â nhw - a does gen i ddim amheuaeth y byddwch chi'n creu rhai i chi eich hun hefyd.

Edrychwn ymlaen at weld eich cyfraniad chi i'r campws wrth iddo barhau i ddatblygu."